മമ്മൂട്ടിക്കയുടെ ഫറോക്ക് പാലം

മമ്മൂട്ടിക്ക നാട്ടില്‍ അറിയപ്പെടുന്ന ഒരു ചീട്ടു കളിക്കാരനാണ് ,നാട്ടിലെ ഒരേയൊരു ജന്‍മിയുടെ ഒരേയൊരു മകന്‍ ,ഒപ്പം ചീട്ടു കളിച്ച പല പാവപ്പെട്ടവരേയും മൂപ്പര്‍ പണക്കാരനാക്കിയിട്ടുണ്ട് ,ചീട്ടു കളി കഴിഞ്ഞാല്‍ മൂപ്പര്‍ടെ വിനോദം വെടി പറയല്‍ ,അത് കേള്‍ക്കാന്‍ വയസ്സന്‍മാരും കുട്ട്യോളും ചെറുപ്പക്കാരും മൂപ്പര്‍ടെ ചുറ്റിലും താടിക്ക് കയ്യും കൊടുത്ത് ഇരിക്കും 

ഇന്നും കണ്ടു മൂപ്പര്‍ടെ ചുറ്റും ആള്‍കൂട്ടം,ഇന്നിപ്പോ പ്രത്യേകിച്ച് ഒരു പണിയുമില്ല ,ഒന്ന്‍ കേട്ടുകളയാം മൂപ്പര്‍ടെ വിടല്‍ ..

മൊയ്തുക്കയുടെ പെട്ടികടയിലാണ് ഇന്നത്തെ ഇരിപ്പ് , കള്ളി തുണിയും ബനിയനും തലേകെട്ടുമായി മൂപ്പര്‍ വാ തുറന്നു ,

"ഞമ്മള് ഇന്നലെ ഫറോക്ക് പാലത്തിന്‍റെ ചോട്ടില് ഇരിന്ന് ചീട്ട് കളിച്ചോണ്ടിരിക്കുമ്പോ പൊഴേല് മീന് കൂറ്റം കുത്തി കളി ക്കണ്,ഒടനെ തന്നെ മ്മള് അപ്പോര്‍ത്തേ കുട്ട്യാപ്പൂന്റെ പീട്യേന്നു ഒരു ചൂണ്ടല് മാങ്ങി ,
ഒരു എരേനീം കോത്ത് പൊഴേക്ക് ഒരേറു കൊടുത്ത് ഈറ്പ്പന്‍റെ മറ്റേ അറ്റം ഫറോക്ക് പാലത്തിമ്മേല് തന്നെ കെട്ടിട്ട് ,
ഒരു ചായ കുടിച്ചാന് മ്മള് സൈതാലിന്‍റെ മക്കാനീക്ക് പോയി ,ഒരു സുലൈമാനീം കുടിച്ചോണ്ടിരിക്കുമ്പോ ,ഇന്‍റേ മമ്പോര്‍ത്ത തങ്ങളേ സൈതാക്കന്മാരെ ഫറോക്ക് പാലം ഇങ്ങനെ ആട്ണു ,ആട്ടംന്ന് ബെച്ചാ ഒടുക്കത്തെ ആട്ടം , കാര്യന്താ ഒരു പരുത്ത മീന് ഇന്‍റേ ചൂണ്ടേമേ കൊത്ത്യേക്ക്ന് ,ഞമ്മള് പിന്നെ അമാന്തിച്ചില്ല ,അരേ ല് കെടക്ക്ണ കത്തി ഇങ്ങട്ട് ഊരി ഒരു ഏറ് ,അത് കൃത്യം ഈര്‍പ്പമ്മേ തന്നെ കൊണ്ട് ചൂണ്ട പൊട്ടി ,ഞമ്മള് ആ പണി അപ്പോ ചൈത്തില്ലേങ്കി ഇന്ന്‍ ഫറോക്ക് പാലം ഇല്ല്യാ ,,,,,,,,"

വയറ് നിറഞ്ഞു ,എല്ലാരും മുഖത്തോട് മുഖം നോക്കി ഒരു ഇളിഞ്ഞ ചിരിയുമായി പല വഴിക്ക് പിരിഞ്ഞു ,,,,,,,